出道20周年的藍奕邦，向來以寫得又唱得見稱，創作光譜橫跨多個類型，去年底推出新歌《漂漂亮亮地死去活來》後，小別香港樂壇近8個月，緊密籌備全新90年代house曲風《男孩子！》，為踏入20周年揭開音樂序章！
擺脫枷鎖 大玩90年代house曲風 風流妖冶Clubbing舞池快歌
新歌《男孩子！》是藍奕邦於《晚晚禮拜六》及《青春於舞池流逝》後，相隔12年後再度製作的舞曲，他坦言是時候了：「我覺得自己仲未做到首放落舞池嘅快歌，我想做一首Gay Disco Anthem，係時候嚟個Update。」藍奕邦指當年社會風氣與現時不同，唱片公司對這類型的歌曲亦有擔憂，所以創作《晚》及《青》的時候的確要「勒住勒住」：「嗰段時間要比較曖昧或者隱晦少少，經過咁多年，從我嘅音樂到我社交媒體，其實已經好清晰。嚟到2024年可以開放啲、去盡啲去做呢類型嘅嘢，做盡佢。所以呢首歌係送畀所有又溫柔又風流嘅男孩子。」
「夜長 夢多 唔繽紛點消磨 青春 無多 與你發生觸摸」-《男孩子！》
藍奕邦自從放開傳統枷鎖以後，無論造歌還是做人亦愈來愈自在，新歌的「親愛的 沒有檢點的需要」、「點解仲偷偷摸摸」正好描述他當下的態度，無需標籤或隱藏，大大方方成為最真實又多變的自己。可以沉鬱、可以浪漫、可以型格，同時亦可以妖冶風流，這就是藍奕邦。
首次出埠造歌 孖曾與女團2NE1成員合作的洛杉磯音樂人打造
新作邀來曾為韓國女團2NE1成員李彩琳CL、美國男歌手John Legend及Neyo等合作的洛杉磯音樂人JerryLang II，夥拍經驗豐富的謝國維以及藍奕邦聯合監製，他說：「年頭我返咗溫哥華休息，忽發奇想叫住喺L.A.（洛杉磯）嘅堂妹，介紹啲相熟嘅新晉監製畀我識，佢因工作關係認識好多當地的監製同音樂人，反正廿年來都未過自己出埠造歌，就係咁，我過咗去L.A.同Jerry困獸鬥咗兩日寫同編好《男孩子！》。」
成就解鎖與四小鮮肉拍MV 拍足兩日：「台灣係熱過香港！」藍奕邦除了解鎖「首次出埠造歌」，更是首次出埠拍攝MV：「我入行20年原來係冇出埠拍過MV嘅，今次係小弟第一次喺香港以外地方拍MV。導演阿爛覺得我哋要拍嘅嘢，喺香港好難實行到，MV嘅角色亦都想有啲新鮮感，咁啱喺台北有在台港人幫到手，同埋我想講台灣係熱過香港！大家以為香港34度好辛苦，Sorry，台灣係35、6度，拍兩日唔使郁企喺度都標緊汗，我仲有好多江湖味嘅服裝，所以真係寓工作於減肥。」
MV的風格充滿江湖電影的味道，身為老大的藍奕邦帶同鍾岳軒、陳威銘、劉大澄及阿元四個「仔仔」到處去闖蕩，於台北街頭夾公仔、食冰、兜風，他更風騷坐出車外大騷妖味。「好似當年我拍電影《飛砂風中轉》咁，係江湖大佬，做嘢嗰陣好狠又好風流但又可以好溫柔，我覺得呢個感覺好正。」整個MV更特意以黑白調色，加上傳統台北街頭的影像，為《男孩子！》添上不羈與優雅的復古情懷。
藍奕邦出道20周年：「藍奕邦唔係食老本。」
藍奕邦笑謂已經出道20周年，於是為自己設立新的課題「我的歌單仲有咩歌未有呢？」，以此為創作核心寫新作：「呢首歌就係一個kick-off，想話畀大家知藍奕邦唔係食老本嘅，仲有新作品畀大家聽到，去到年底應該會有啲得意嘢發生，跟開藍奕邦嘅Fans應該會好開心嘅，不過就賣個關子先。希望大家聽《男孩子！》會開心啦，希望大家鍾意個MV，亦都會鍾意MV入面嘅四位男孩子。」
藍奕邦新歌《男孩子！》MV：
《男孩子！》
曲: Jerry Lang II / 藍奕邦
詞: 藍奕邦
編 / 監: Jerry Lang II / 謝國維 / 藍奕邦
若你有被肯定的需要
就叫人攬攬你的腰
若你也未安份不緊要 oh~
陪我來偷偷跳
親愛的 沒有檢點的需要
(人狂熱就發燒)
未醒時 飲住跳 哭住笑
「呢個 嗰個 揀錯可以揀過
夜長 夢多 唔繽紛點消磨
青春 無多 與你發生觸摸
點解仲偷偷摸摸」
Why can’t we just have it all?
男孩子你需要更風流
來抗衡幾多皺眉頭
男孩子你可以更溫柔
來攝服只需尾指一勾
一愛 通通都想愛
一愛 羞恥也放開
可愛 不需多遮蓋
假的戀愛 更要派得慷慨
親愛的 別再標籤你是誰
硬漢亦 柔情如水
為最骯髒噴噴香水
男孩子你需要更風流
用滿面春色救地球
男孩子有幾個太荒謬
就咬實忠旨別要知醜
一愛 一街都想愛
一愛 底牌也揭開
不愛 不知幾可愛睇啱即愛
I’ll show you how it’s done!
「呢個 嗰個 揀錯可以揀過
夜長 夢多 唔繽紛點消磨
騷貨 次貨 多個都唔嫌多
點解仲偷偷摸摸」
(I’ll show you how its done!)
Comments