唱作歌手何展睿Steve早前因媽咪家中暈倒入院接受緊急手術，近半年投放大部分時間專心照顧陪伴她，他表示：「出事到依架接近半年，真係做到「關關難過關關過」，除咗病情起伏、醫院人事問題，曾經令佢心情低落。睇到媽咪吞嚥進食進步、陪佢積極參加復康治療，都係希望佢唔好放棄，可以企翻起身。半年照顧經驗中，我自己都學咗好多，只要見到佢進步，幾辛苦都值得！」
近年，Steve雖然同時要兼顧音樂教學、香水品牌推廣、照顧媽咪，仍不忘為新專輯赴日進行拍攝：「其實呢張新專輯誕生都係因為媽咪，因為呢半年佢嘅經歷令我有好多感覺。除咗作左首新歌《手心的溫度》比佢，鼓勵佢要努力企返起身，專輯內其他歌曲都係自己作嘅純音樂，想藉著製作一張音樂治療專輯，安撫佢同其他病人既心靈，應該都算係香港比較少歌手會做嘅事。」
而26號生日既Steve，希望將生日願望送俾媽咪，祝福佢早日康復：「我嘅生日願望梗係想佢早日康復，記得佢剛做完手術，開聲講嘢都唔得，要用鼻喉進食。呢幾個月已經可以用牙齒咀嚼。有一日去酒樓飲茶，佢當場感動大哭，我自己都感觸到匿埋咗喊，所以生日當日都會全日陪佢。另外，我都會聽佢叮囑做多啲善事：早前中秋節親身探訪劏房朋友，派物資比佢哋。見到佢哋生活環境，感觸良多，不停警醒自己要好好珍惜現有。有能力就要回饋社會，為阿媽積福！」
Comentarios