唱作歌手何展睿Steve相隔四年再次推出新碟《音樂的意義》，Steve表示今次新碟非常特別：「自己將創作歌手、演奏者、調香師三個身份既能力投放係新碟內，全碟音樂自己一手包辦、親身上陣現場演奏錄音。因為呢隻係治癒音樂專輯，所以配合幾首歌設計咗香水、制作香薰蠟蠋、乳液，希望比大家係聽覺、視覺、嗅覺、觸覺都得到享受。」
Steve一連幾日親身落力推銷新碟，選擇於市集攤檔舉行有特別意義：「今年好開心成功創立自己香水品牌，算係第二個事業。記得年頭媽咪出事入院做手術昏迷期間，自己參加市集正正可以比我分散注意力努力工作，最開心係遇到好多客人、粉絲嚟支持同慰問。有日仲遇到兒童資深藝人蓋世寶姐姐，同佢分享經營之道，佢仲叫我唔好放棄音樂，所以我梗係要親身嚟介紹新碟俾客人啦！第一批boxset 限量版巳經賣曬，多謝大家支持！」
講到新碟以「治癒」為主題，多首歌曲為純鋼琴音樂，原來跟Steve媽咪有重大關係：「今年同媽咪經歷生死，近期同佢一齊參加復康課程，見到佢開始企起身，心情好激動。自己將媽咪入院至今每日情況都記低，結集成《母親康復日誌》。一邊回味內容一邊感受呢半年經歷，成功將感情投放係新歌《手心的溫度》。但覺得送一首歌唔夠，不如索性造一隻治癒音樂專輯更好。除咗送比媽咪之外，又可以鼓勵同路人，因為家人陪伴同鼓勵對病人係好重要。而今次新碟既收益會撥捐「香港復康會」作慈善用途，咁就更加有意義！」
最後，講到新一年音樂大計，Steve表示除了再次推出大碟外，會製作四首新歌，更希望舉行音樂會答謝粉絲多年支持及等候。
Comentários