出爐四料影后兼準人妻衛詩雅（Michelle）與導演劉偉恒（Benny）及太太王沛然，還有12歲的大女饅頭與10歲的細女包包，早前一同跟隨宣明會到柬埔寨兩個社區進行探訪。經過一星期探訪和體驗當地居民及孩童生活，Michelle與Benny感受甚深。
行程中，他們獲安排先到宣明會剛開始進駐的Kuleaen社區，探訪特困家庭，其後又到訪修葺中的小學，然後再經6小時車程，到達另一個宣明會已進駐十多年，即將完成發展目標的Baribour社區探訪，從兩個社區內農耕、煮食、教育、基建、水利等多方面的對比，他們正好以助養者的第一身去感受宣明會如何透過社區發展改善孩童的生活。
Michelle自言自己性格很感性，公司同事都提點她控制淚腺，唯去到當地探訪仍禁不住被觸動落淚，她說：「去探訪，我知道會有感受，但係冇諗過咁多感受。好似佢哋同我化新娘妝咁，嗰個年青人得到支援有機會去學化妝，而家仲係當地嘅人氣化妝師，真係好感動，呢個係好有意義嘅新娘妝。」
而Michelle最快樂的行程，就是到宣明會即將完成發展目標的Baribour社區，與助養了6年的助養女兒Chankoa見面，又與「女兒」溫馨做手工，她說：「見到佢已經眼濕濕，但係又唔想嚇親佢，所以要忍住啲眼淚。我仲扮晒阿媽咁，叫佢拎啲功課出嚟睇吓，我即刻有啲唔好意思，因為我用當地嘅高棉語寫咗張卡畀佢，但係佢啲字靚過我好多。」Michelle表示手寫高棉語，是未婚夫的意思：「佢叫我唔好寫英文，用返當地語言容易啲溝通，我即刻開電話睇住個翻譯嚟抄。」
她希望將來能帶同未婚夫再度探訪：「希望15年後，我再返嚟探佢哋（Kuleaen社區），見證佢哋嘅改變。如果將來有小朋友，我都好希望佢哋可以睇到呢啲片段，甚至有機會嚟經歷吓。」她坦言首兩天探訪特困家庭，看到他們的害怕：「佢哋 (特困家庭) 唔敢同你傾偈，連眼神接觸都唔敢，但係喺後面已經發展完嘅社區，我見到自信，就算15、16歲都會走埋嚟同我分享。原本我都會諗，我可以幫到佢哋啲咩呢？到咗第三日，我見到希望。以前我可能好快落判斷，覺得幫唔到手，而家我覺得要花時間睇清楚、了解清楚，係真係可以幫到佢哋，蟋蟀場、菜園同學校呢啲，見到佢哋可以照顧到自己，真係好開心，我見到好多希望，好多謝宣明會邀請我嚟。」說畢，Michelle感動到眼濕濕。
她直言單憑相片、片段甚至她的分享，對大眾來說可能感受不深，但Michelle相信上天給予她這次探訪的機會，必定有意義：「我真係好感謝可以嚟到呢度，我睇到佢哋好勤力，只係佢哋冇資源同方法。我哋身邊有啲人，畀咗方法佢哋、教佢哋點做，但係佢哋就係唔做，但係呢度嘅人好努力。可能只係畀一隻雞佢哋，話畀佢哋聽可以點，佢哋就可以變到而家咁，所以我覺得真係要珍惜，珍惜你哋擁有嘅一切。我唔係話一定要大家捐錢，但係至少遇到困難，唔好話『我好慘』、『我冇辦法』，辦法一定有㗎！」Michelle表示經過這次的體驗，回港後即時再多助養兩名兒童，連同已經助養的三名兒童，Michelle準備榮升「五孩之母」！
而Benny與太太於探訪行程初期，對於自己能否幫助到有需要的人，同樣感到疑惑：「我哋嚟派一餐飯，鼓勵吓佢哋，大家跳一日繩，咁之後呢？我哋可以做啲咩幫到佢哋？」直到親身看到孩童、家庭與及整個社區的成長，Benny感動地說：「勿以善小而不為。可能我哋會諗每個月嗰少少錢，每年收吓信同卡，到底我哋幫到啲咩呢？今次我哋真係睇到。改變唔係一朝一夕嘅，當中有好多困難係我哋想像唔到，但係畀啲時間就會做到。」
作為父親，Benny對行程中遇見的其中一位爸爸感受甚深：「初初覺得佢冇乜笑容，後來同佢影吓相、傾吓偈，見到佢開始笑。呢個爸爸曾經有啲唔好嘅習慣，因為宣明會嘅『喜樂家庭』課程，令佢改變咗好多，做返個爸爸、做返個男人。可能佢係由20呎嘅爛茅屋，慢慢到有自己嘅屋，男人就係要孭起頭家，佢其實好可愛，我最記得佢，我都要做好啲！」
Michelle與Benny異口同聲表示，這個「助養兒童計劃」的親身體驗遠超一般大眾想法，不僅捐錢幫助他們獲得日常食物，也看得到整個計劃背後的意義 —— 支援地區發展（包括： 教育、水資源、健康、兒童保護和生計發展等不同範疇的工作），藉此幫助他們長遠改善生活環境，維持生活所需。
香港世界宣明會一直透過「助養兒童計劃」集合助養者的捐款，為助養兒童、家庭及社區居民改善生活，從教育、水資源、健康、兒童保護及生計發展等不同範疇，為孩子以至整個社區帶來可持續發展，重燃希望。
Comments